Wikipedia:UIL Latinum

Fro Wikipedia
Jump to navigation Jump to search
« Supru a UIL kontenaje
Angli versione de disi chapitre
»
Antei:
Un existanti lingue?
Sekuenti:
Objetiones konter konstrukteti lingues

Latinum?[edit source]

Latinum esed durant sekles li international lingue del plu alti intelektual monde, e lu bli ankore usa extensivim dal Romani Katoliki Eklesie: pro quu non rivivafika lu por omni funktiones? Tu vud sertim have li avantaje de neutreso e talim evita li objetiones jus mentionati. A ti skolastes kel sonja pri disi role por latinum li respondo es evidenti; latinum ha have ti positione, e ha perda lu nonrevokablim kom konsekuo del natural developo del lasti tri sekles o plu multis. Even klasiki skolastes usa latinum tre pokim nunitem in lesen siential paperes. E exter lesen angusti sirkles tre poki homes nun pove lekte, ankore min multim parla e skripte latinum malgre li grandi nombre de hores devoteti a ti lingue in multi skoles. Quanti sientiistes vud nun pove lekte li verkes de Newton o Tycho Brahe in li originale? E quantes es kel lekte latinim even tali exelanti verkes kom Encomium Moriæ da Erasmus o Nicolaus Climius da Holberg. Kand on veni por exprese li idees de nusen propri die, li defektes de klasiki latinum apari in sinmiserikordi klareso: telefones e vetures e radio have nuli spatie in li latinum de Cicero, e kreo nov-latini vordes por disi e altri moderni inventiones sal es pokim util, den li toti strukture del lingue kun lusen komplikati formes e komplexi sintaxe, kel tenta li skriptere a tordati satses, ha deveni talim kompletim antiquisati ke nus del duesmi sekle grimase pro li idee de devo vesta nusen penses in ti kostume.