Lume
.JPG)
Lume, vidabli lume o vidabli radiatione es elektromagneti radiatione kel li homal okule pove persepte. Vidabli lume kovra li vidabli spektre e have ond-longesos inter 400–700 nanometres, keles koresponda a frequentesos inter 750–420 terahertz. Li vidabli spektre es situat inter li infraredi (plu longi ond-longesos e plu basi frequentesos) e li ultervioleti (plu brevi ond-longesos e plu alti frequentesos).
In fisike, li vorde “lume” pove signifika elektromagneti radiatione de irgi ond-longeso (od vidabli o nonvidabli). Talim gamma-radies, X-radies, mikroondes e radioondes es anke lume. Li chefi qualitates de lume es intensitate, direktione de propagatione, frequenteso e polarisatione. Len rapideso in vakuum, 299792458 m/s, es un ek li fundamental konstantes de nature. Omni elektromagneti radiatione montra irgi qualitates de et partikles e ondes. Li elementari partikles de lume (fotones) pove bli detekte per spesialisat aparate.
Komensim del 20esmi sekle on debatad li nature de lume, e Planck e Einstein proposid explikationes kel suposid ke lume porta energie in quantus (vida quantum-teorie, fotone). Disdi fisikistes explika lumal fenomenes segun o ondi, o quantus, usant sempre li maxim konvenanti explikatione por li partikulari eme.
Li chefi fonte de natural lume sur nusen tere es li sune. Historialim altri importanti fonte de lume pro homaro esed faire (fro ansieni kamp-faires a modern parafinali lampes).