Konstitutional chanjo de Bricker

Senatane John W. Bricker, li proposiere del konstitutional chanjo por limita li "povo de traktate" del guvernantaro del Unionati States de Amerika.

Li Konstitutional Chanjo de Bricker es li kolektiv nome de serie de propositi chanjos del Konstitutione del Unionati States de Amerika kel blid konsidera del Senate del Unionati States de Amerika durant li 1950 dekyare. Ti chanjos vud ha restrikte li extenso e ratifikatione de traktates e exekutiv konkordos kel li Unionati States de Amerika vud fa. Lus bli nomat segun John W. Bricker de Ohio, amerikan konservativi Republikane, kel proposit lus.

Isolationisme, li opinione ke li Unionati States devud non prenda parte in altrilandal konfliktes e mondal politike, ha omnitem es elemente de amerikan politike ma esed spesialim forti durant li yares sekuenti li Unesmi Mondal Milite. Amerikan vado en li Duesmi Mondal Milite supresed isolational opiniones ma lus retrovadad durant li aftermilital yares kom respondo al novi international role del U.S.A., spesialim al novi Unisat Nationes e lun filial international organisationes. Kelkes timad li perdo de amerikan suvereneso a disi transnational organisationes, pro li role del Soviet Unione in li difusione de international Komunisme e li Koldi Milite.