Novajes fro Finlande 2009.06.06

Sixesmi (6esmi) de june dumil-nin (2009)

Semane duanti-tri (23) de dumil-nin (2009)

Putin renkontrad Vanhanen in Finlande

Li primi ministre de Russia, Vladimir Putin, ha visita Finlande. Putin renkontrad durant sen visito primi ministre Matti Vanhanen e presidente Tarja Halonen.

Primi ministres Putin e Vanhanen diskused questiones pri trafike e energie, exemplim li gas-pipe del Balti Mare. Anke li kase del puero Anton esed importanti questione in li konversatione.

Lasti seman Russia donad note a Finlande, pro ke segun li Russian autoritates li filio de russi matra blid porta non-legalim a Finlande. Ofisiiste del Ministerie de Exterlandal Aferes sekretim portad Anton e lon patro in hintrukofre de automobile fro Russia a Finlande. Segun li Ministerie de Exterlandal Aferes de Finlande li russi matra anteu non-legalim kidnapad* Anton a Russia.

Pasajer-aeroplane de Air France desaparid

Pasajer-aeroplane de avie-firma Air France desaparid lundi. In li aeroplane esed dusent-duanti-ot (228) homes. Li aeroplane esed voyajant fro Rio de Janeiro, Brasilia, a Paris, Fransia. Li fransi aeroplane desaparid super li Atlanti Oseane proxim Brasilia. Li kause del desapario del aeroplane non es savat. Posibli kauses es potenti tempeste o homal erore.

In li Atlanti Oseane li sercho por li falati aeroplane de Air France kontinua. On sercha por li aeroplane in li mare inter Brasilia e Moroko. Fransia senda submaral bote por sercha li pasajer-aeroplane.

Obama visitad Germania e Fransia

Li presidente del Unionati States, Barack Obama, ha visita Germania. Obama renkontrad li primi ministre de Germania, Angela Merkel. Li presidente e li primi ministre diskused exemplim pri li ekonomial deklino, pri Iran e pri li milite in Afganistan.

Sundi Obama visitad Fransia. Sur li litore de Normandia li presidente prendad parte in li fransi memoraje. Sundi sixanti-sink (65) yares had pasa depos li invasione de Normandia, kel marka li komenso del fine de natsi* Germania.

Aplikatione por Asile chanja

Aplikatione por asile chanja in Finlande. Ministre de Enmigratione e Europa, Astrid Thors, proposi ke on kontrola plu multim li uniso de families. In future li autoritates pove anula aplikatione por asile si aplikere ha dikte fruim falsi informatione, exemplim pri sen familial relationes.

On voli ke aplikatione por asile sal bli chanja rapidim, e li parlamente sal trakta li afere forsan ja in li autumne. Li novi prosedo sal usa li evaluationes del Unionati Nationes, exemplim, pri quam sekuri diferanti landes es.